CONSULTATION MEETING GIN KUNDUKTO SA BUTNGA SAN MGA OPISYAL SA BUNGTO SAN CATARMAN NGAN STALL OWNERS SA CATARMAN PUBLIC MARKET

IIEME/RMA/9-27-21/Catarman N. Samar

Ginbuhat an sayo nga consultation meeting sa butnga san mga opisyales san munisipyo ngan mga stall owners sa Catarman Public Market sa barangay Narra sito September  24, 2021 sa Catarman Freedom Park.

Sa  mensahe ni Mayor Francisco C. Rosales, Jr.  gin pag-aghat an  stall owners nga magpabakuna kontra sa COVID-19. Kadam-an naman san mga nag-atendir in mga bakunado na.

An katuyuanan san meeting mao an pagpasabot sa mga may pwesto sa merkado bahin sa duha nga development projects nga ig titindog sa ira lugar: an Catarman Dry Market Building 1 ngan an Catarman Shoppersville. Igsasaliwan ini sa mga daan na nga edipisyo nga presente nga gin-ookuparan san mga negosyante dida sa public market.

Gin presentar  ni Municipal Engineer Carlito Danque ngan Architect Rafael Villegas an disenyo san duha nga ig titindog nga building. Pareho ini duha kaandana nga may sadang nga espasyo ngan kumpleto sa comfort rooms. An mga proyekto in pinondohan pinaagi sa loan agreement sa Land Bank of the Philippines. An Dry Market Building 1 in kapareho an disenyo san gintitindog yana nga Dry Market Building 2 nga pinondohan ni Senator Bong Go.

Dida sa meeting presente si Economic Enterprise Manager Intoy Tejero ngan  Municipal Treasurer Marietta Pabello diin igin isplekar an mga patakaran san mga magpupwesto sa new market buildings. Una sini kinahanglan updated an ira pagbayad san  renta sa munisipyo. 

Gintagan sin higayon an stall owners nga makapangutana ngan makahatag sin suhestyon bahin sa proyekto. Pira sa ira an nagpahayag na  sin pasasalamat kan Mayor Rosales sini nga proyekto nga makakahatag sa ira sin mas himyang nga pagnegosyo.